إلْفوندو / طنجة
فْتحات النيابة العامة بطنجة تحقيق من بعد ما توصلات بإشعار رسمي من القنصلية العامة الإسبانية فالمدينة بخصوص عشرات ديال ملفات طلبات الفيزا لإسبانيا، اللي تبين أن فيها وثائق مشكوك فصحتها، خصوصا عقود العمل، شواهد الأجرة، وكشوفات الحسابات البنكية.
القضية بدات من بعد عمليات افتحاص داخلية دارتها القنصلية العامة الإسبانية بطنجة، واللي كشفت وجود معطيات متناقضة ووثائق يشتبه تكون مزورة فملفات تأشيرة فضاء شنغن. وعلى إثر هاد المعطيات، النيابة العامة بالمحكمة الابتدائية بطنجة عطاتو تعليماتو للشرطة القضائية باش تبدا أبحاث موسعة وتشمل جميع المعنيين.
التحريات غادي تركز كذلك على واش كاينين سماسرة ولا وسطاء كيستاغلو الناس وكيواعدوهم بتسهيل الفيزا مقابل الفلوس، خصوصا مع الضغط الكبير على مواعيد الطلبات والإقبال المتزايد على إسبانيا.
وما مستبعدش تكشف الأبحاث على شبكة منظمة ورا هاد الوثائق، إلى ثبت أن الأمر ماشي حالات معزولة ولكن كيتعاود بنفس الطريقة.
