إلْفوندو / الرباط
أعلنت المندوبية العامة لإدارة السجون وإعادة الإدماج، أنه بمناسبة عيد الفطر، غادي يتسمح للنزلاء بصفة استثنائية يتوصلو بقفة المؤونة من عند عائلاتهم، ابتداء من ثاني نهار العيد ولمرة وحدة فقط.
وجا هاد القرار، حسب بلاغ المندوبية، لأن مناسبة العيد عندها أثر إيجابي على نفسية النزلاء، وكاتساهم حتى فتعزيز الروابط العائلية بينهم وبين أسرهم.
ووضحت المندوبية أن هاد العملية غادي تهم العائلات اللي عندها الحق فالزيارة، وحتى الممثلين الدبلوماسيين والقنصليين بالنسبة للسجناء الأجانب، وفق برنامج خاص غادي تسطرو إدارات المؤسسات السجنية.
وأكدت كذلك أنها غادي توفر التسهيلات اللازمة باش النزلاء يتاصلوا بعائلاتهم ويخبروهم بالشروط الخاصة بقفة المؤونة والمكونات المسموح بها، باش تمر العملية فظروف منظمة.
وفالمقابل، دعت عائلات السجناء إلى الالتزام بالضوابط المعمول بها، وحذرت من أي محاولة لتهريب مواد أو أشياء ممنوعة يمكن تهدد أمن المؤسسة والسجناء والموظفين.
وشددت المندوبية على أنها غادي تتخذ إجراءات قانونية فورية فحق أي شخص يثبت تورطه فخرق هاد الشروط، بما فيها إشعار النيابة العامة المختصة.
وزادت المندوبية أنها حضرت حتى برنامج غذائي خاص ومتنوع داخل جميع المؤسسات السجنية، بمناسبة عيد الفطر، باش تدخل شوية ديال الفرحة والبهجة على النزلاء فهاد المناسبة الدينية.
