إلْفوندو / المغرب
تحكمات المحكمة الابتدائية فسيدي سليمان، صباح الثلاثاء، على البرلماني السابق إدريس الراضي المعروف بـ“إمبراطور الغرب”، بأربع سنين ديال الحبس النافذ وغرامة 5000 درهم، بسبب تورطو فملف تزوير وثائق إدارية ورسائل عاملية.
المحكمة قبلات التعرض ديالو شكلا، ولكن فالموضوع أدانتو وقررات حتى إتلاف الوثائق اللي تبدلات، مع تحميلو الصائر.
وفالدعوى المدنية، ترفض طلب عامل الإقليم، ولكن تقبل طلب وزير الداخلية بصفته مطالب بالحق المدني، وحكمات على الراضي يخلص مع باقي المتهمين تعويض 50 مليون سنتيم لفائدة الجماعة السلالية أولاد حنون.
وكان الحكم الأول صدر غيابيا العام اللي فات، قبل ما يعاود يتفتح الملف من بعد التعرض ديالو ويتصدر الحكم الجديد.
