إلْفوندو / الشاون
تمكنات عناصر المركز القضائي ديال الدرك الملكي بإقليم شفشاون، فعشية اليوم، من تنفيذ عملية أمنية محكمة لي أسفرت على حجز كمية كبيرة من مخدر الشيرا وتوقيف واحد المشتبه فيه، فإطار المجهودات المتواصلة لمحاربة الاتجار فالمخدرات.
هاد العملية دازت فدوار مشات التابع لجماعة باب برد، من بعد معلومات دقيقة وتتبّع ميداني لتحركات مشبوهة كان كيرجّح ارتباطها بشبكة كتنشط فالنقل والتهريب ديال المخدرات.
وحسب المعطيات المتوفرة، عناصر الدرك دارو خطة محكمة ونصبو كمين دقيق، لي خلاهم يحاصرو المشتبه فيهم ويتمكنو من حجز جوج سيارات كانت كتستعمل فهاد النشاط، وكانو محملين بـ77 رزمة ديال الشيرا.
وتم توقيف واحد من السائقين بعين المكان، فحين السائق الآخر قدر يهرب مستغلاً المسالك الوعرة ديال المنطقة، فيما باقي الأبحاث مازال متواصلة باش يتحدد الهوية ديالو ويتشد.
هاد العملية كاتدخل ضمن الاستراتيجية الأمنية لي كاتهدف تضييق الخناق على شبكات المخدرات وتعزيز الإحساس بالأمن، عبر العمل الاستباقي والتنسيق الميداني المحكم ديال مصالح الدرك الملكي.
