إلْفوندو / هولندا
دخلات النيابة العامة الهولندية فخط جديد فمحاربة شبكات الجريمة المنظمة، حيث حطّات شقيقة رضوان تاغي، اللي كيتزعم ما يعرف بـ”موكرو مافيا”، فـلائحة المطلوبين دوليا، حسب ما صرّح به المتحدث باسم مكتب المدعي العام لقناة RTL.
وحسب نفس المعطيات، فالشقيقة ديالو مشكوك فكونها كانت كتعاون فالتنسيق والتواصل بين عناصر الشبكة الإجرامية، خصوصا بين واحد المتورط فالاتجار الدولي وغسل الأموال، وولد تاغي اللي عندو 25 عام، واللي تحكم عليه بـ6 سنين حبس نافذ بسبب الانتماء لتنظيم إجرامي.
التقارير كتشير حتى أن المعنية بالأمر ممكن تكون هربات للمغرب، بعدما كانت البوليس الهولندية شدّاتها فـ2019 مع خمسة ديال الناس آخرين فملف فيه شبهات غسل الأموال وتسهيل التواصل بين أفراد العصابة، ولكن من بعد أيام تطلق سراحها ومن داك الساعة اختفات وما بقاتش تبان.
القضية كتبقى مرتبطة كذلك بواحد من أخطر الجرائم اللي تنسبات لـرضوان تاغي، وهي جريمة مقهى “لاكريم” فمراكش عام 2017، اللي خلّات صدى كبير فالمغرب وخارجو، وخلّات اسمو يتربط بشبكة دولية كتنشط فالمخدرات وتبييض الأموال.
