إلْفوندو / طنجة
عرفات دورة مجلس جماعة طنجة نقاش سخون ومداخلات تقيلة، ولكن اللي شدّ الانتباه بزاف هو التدخل ديال نائب العمدة المكلف بالمحجز البلدي، عبد العظيم الطويل، اللي خرج بمعطيات قال عليها صادمة بخصوص مداخيل هاد المرفق.
الطويل وضّح باللي المجلس الحالي قدر يطلع بالمداخيل السنوية ديال المحجز لأكثر من 700 مليون سنتيم، فحين الولاية اللي فاتت، واللي كان فيها العيدوني مسؤول، ما كانتش كتفوت 100 مليون سنتيم فالسنة، وهو الفرق اللي خلا بزاف ديال التساؤلات كتطرح راسها.
وأضاف المسؤول الجماعي أن هاد الأرقام ماشي غير كلام، بل كاينين محاضر رسمية فالأرشيف ديال الجماعة اللي يمكن يرجع ليها أي واحد باش يتأكد من المعطيات.
وفنفس السياق، كشف الطويل على وجود خروقات فطريقة تدبير بعض السيارات داخل المحجز، مؤكدا أن المجلس توصل بشكايات من المواطنين، ودابا كاين تحقيق جاري باش يتوضح كلشي.
ومن بين الملفات اللي تفجّرات، جا ذكر سيارة من نوع “غولف” خضرا، فين وجّه الطويل اتهام مباشر للمسؤول السابق، محمّلو فيه جزء من المسؤولية، مع التأكيد أن الملف مازال محل بحث من طرف الجهات المختصة.
هاد التصريحات جاو فواحد الوقت اللي فيه مطالب كبيرة بتعزيز الشفافية وربط المسؤولية بالمحاسبة، خصوصا فالمرافق اللي كتدخل فلوس مهمة لميزانية الجماعة.
