إلْفوندو / المغرب
خلق “نظام الطيبات” اللي كيقدمو د. ضياء العوضي ضجة كبيرة فالمغرب، وولا حديث الناس فالفايسبوك والتيك توك، خصوصا بعدما بزاف ديال المغاربة بداو يتبعو هاد النظام الغذائي اللي كيعتمد بزاف على البيض والدجاج وأكلات بسيطة بثمن رخيص.
ومع الانتشار الكبير ديالو، بدا التأثير ديالو يبان حتى فالأسواق، بعدما تْداولو ناس بزاف فيديوهات لتجار البيض والدجاج كيشكيو من هبوط الثمن وقلة الربح، مؤكدين أن الإقبال تبدل بشكل واضح فالفترة الأخيرة.
وحسب هاد المقاطع، عدد كبير من العائلات ولاو كيعتمدو على البيض بشكل يومي، باعتبارو مصدر بروتين رخيص وساهل، خصوصا مع الغلاء اللي كتعرفو بزاف ديال المواد الغذائية، وهو الشي اللي خلا “نظام الطيبات” ينتاشر بسرعة كبيرة بين الشباب وحتى العائلات.
وفالمقابل، كاين اللي كيعتبر أن هاد الانخفاض غير مؤقت ومرتبط غير بالموجة ديال الترند اللي دايرها النظام فالسوشيال ميديا، بينما كاين اللي كيشوف أن المغاربة بداو يبدلو العادات الغذائية ديالهم ويتجهو للأكل البسيط والصحي بأقل تكلفة.
وبين المؤيدين والمنتقدين، باين أن “نظام الطيبات” خرج من مجرد وصفات فالإنترنت وولا موضوع كيأثر حتى على السوق والأسعار داخل المغرب.
