إلْفوندو / طنجة
عاشو سكان حومة سپانيول فطنجة صباح نهار السبت لحظات صعيبة ومؤلمة، بعدما تحوّلات كلاب كان كيربيها واحد السيد على أنهما أوفياء ليه، إلى مصدر خطر قاتل أنهى حياتو بطريقة صادمة.
حسب شهادات ناس الحي، الضحية كان مولوع بتربية الكلاب، وكان عندو أكثر من فصيلة من بينها “بيتبول” و”مالينوا” و”بيرجي”، وكان كيتعامل معاهم بشكل عادي وكيعتبرهم جزء من حياتو اليومية. لكن فظروف مازال غامضة، هاجموه بشكل مفاجئ وتقابو عليه، وخلّفو ليه إصابات خطيرة خاصة على مستوى الوجه.
تم نقل الضحية على وجه السرعة لمستشفى محمد الخامس، لكن رغم التدخلات الطبية، ما قدرش يصمد وفارق الحياة متأثرا بالجروح البليغة اللي تعرض ليها.
وفور علمها بالحادث، حلت السلطات الأمنية بعين المكان بسرعة، وتم حجز الكلاب المعنية باش يتفادى أي خطر محتمل على سلامة الساكنة، فيما فتحت تحقيقا للكشف على ظروف وملابسات هاد الواقعة المؤلمة.
