إلْفوندو / الرباط
فخطوة كانت متسناها بزاف ديال الناس، قررات الحكومة المغربية تنقص عدد ساعات الخدمة اليومية ديال حراس الأمن الخاص من 12 ساعة لـ8 ساعات، وهاد الشي جا فإطار جولة أبريل من الحوار الاجتماعي مع النقابات.
وقال وزير الإدماج الاقتصادي والمقاولة الصغرى والشغل والكفاءات، يونس السكوري، باللي هاد القرار جا باش يحيد واحد الحيف كبير كان كيتعرض ليه هاد الفئة لسنوات طويلة، حيث كانو خدامين بنظام 12 ساعة فاليوم بلا مراعاة للظروف ديالهم.
وزاد الوزير بأن هاد القرار شجاع، رغم أنه غادي يكلف الشركات مصاريف زايدة تقريبا بـ50 فالمية، ولكن أكد باللي كرامة العامل وتحسين ظروف الخدمة خاصها تكون فوق كل اعتبار.
وجا هاد الاتفاق من بعد اجتماع جمع الحكومة مع النقابات، والاتحاد العام لمقاولات المغرب، وكذا الكونفدرالية المغربية للفلاحة والتنمية القروية، فين تم الاتفاق على تعديل مدونة الشغل وإنهاء هاد الاستثناء اللي بقا كثر من 20 عام.
ومن المنتظر أن هاد القرار يبدل بزاف فظروف الخدمة ديال حراس الأمن الخاص، ويعاونهم يلقاو توازن بين الخدمة والحياة الشخصية، غير هو التحدي دابا هو كيفاش يتطبق فالميدان وتكون مراقبة حقيقية للشركات باش تحترمو.
