إلْفوندو / اسبانيا
خيم الحزن فإسبانيا، بعدما أعلن الحرس المدني الإسباني وفاة جوج ديال العناصر ديالها صباح اليوم الجمعة، خلال مطاردة بحرية لزورق ديال تهريب المخدرات قبالة سواحل هويلفا.
وحسب المعطيات اللي خرجات، فإن الحادث وقع بعدما تصادمو جوج زوارق تابعين للمصلحة البحرية ديال الحرس المدني، أثناء عملية مطاردة “ناركولانشا”، فحادث خطير خلا فالأول قتيل واحد وعدة مصابين، قبل ما يتأكد من بعد وفاة عنصر ثاني كان فحالة حرجة.
الحادث خلف كذلك جوج مصابين، واحد حالتُه خطيرة والآخر إصابتُه خفيفة، وسط صدمة كبيرة داخل المؤسسة الأمنية الإسبانية، اللي عبرات على حزنها الكبير وتمنات الشفاء العاجل للمصابين.
ووقعات هاد الفاجعة على بعد حوالي 80 ميل بحري من سواحل هويلفا، فالمنطقة اللي بين هويلفا وكادس، فيما أكدت مصادر أن جميع الضحايا خدامين فالمصلحة البحرية التابعة للكْوارديا سيڤيل بهويلفا، ومن بينهم مسؤول برتبة كابيتان.
هاد الحادث رجع للإسبان ذكريات فاجعة بارباط سنة 2024، ملي دهسات “ناركولانشا” جوج عناصر من الحرس المدني وقتلاتهم خلال مطاردة مشابهة.
