إلْفوندو / الرباط
من بعد ما طالع ثمن الطماطم بشكل كبير فالسوق ووصل حتى لـ15 درهم للكيلو، قررات المؤسسة المكلفة بمراقبة وتنسيق الصادرات توقف تصدير الطماطم لأوروبا وإفريقيا، حسب مصادر مهنية، فخطوة الهدف منها هو تزاد الكمية فالسوق الداخلية وينقص الثمن على المواطنين.
المهنيين أكدو أن هاد القرار جا فبلاصتو، حيث غادي يعاون باش يرجّع التوازن للسوق ويوفر الطماطم بكثرة، خصوصا وأنها مادة أساسية فالمطبخ المغربي، وزادو قالو بلي هاد القرار تلقى ترحيب كبير حتى من المنتجين والمصدرين، اللي شافوه حل عملي باش يحد من الغلاء اللي عرفاتو الأسعار مؤخرا.
وحسب نفس المصادر، بان التأثير ديال هاد القرار بسرعة، بحيث ثمن الصندوق ديال الطماطم فأسواق الجملة فالجنوب هبط من حوالي 350 درهم حتى لـ100 درهم فقط، وهو مؤشر على أن السوق بدا كيتوازن من جديد، المهنيين شددو كذلك على أنهم منخرطين فهاد التوجه اللي كيعطي الأولوية للسوق الوطنية، وكيهدف يحمي القدرة الشرائية ديال المواطنين ويضمن الأمن الغذائي فالبلاد.
