إلْفوندو / تطوان
فضيحة كبيرة واقعة فمجلس “مصطفى البكوري” رئيس المجلس الجماعي ديال تطوان، لي عندو بعض النواب ديالو ما قدرين يلتزموا حتى بالالتزامات ديالهم الشخصية عاد ممكن يلتزموا بالبرنامح لتعاقدو به مع المواطنين.
عيون “إلْفوندو“، أكدت ان أحد نواب رئيس المجلس الجماعي توصل البارح بقرار إفراغ المنزل لي كسكن فيه، بعدما تخلف لأزيد من سنة ونصف عن أداء واجب الكراء، خصوصا أن صاحبنا المكلف بالشأن الثقافي كاري فمكان “هاي كلاص”، نعم اسيدي ساكن فمنطقة الولاية.
العيون ديالنا، أكدت ان مأمور تابع للمحكمة المختصة، جا لْدار ديال هاد السياسي، وخبرو بضرورة الإفراغ، نظرا لحكم المحكمة القاضي بالإفراغ، وهو الأمر الذي استجاب له بسهولة كبيرة جدا، وبالفعل نفذ الحكم والتحق بمنزل والدته لعندو فيها طابق فارغ مخصص ليه.
الغريب هو ان المعارف ديالو فتطوان، كاملين كانو كعتقدو أن المنزل ديالو بإسمو، وهو الأمر الذي وَهّمْ به كل معارفه، الا ان الواقع عكس ذلك، فالنائب رئيس الجماعة “البوكوص” ديالنا طلع غير كاري ومطلعها على صحابو والزملاء ديالو المساكن.
عيون إلْفوندو فتطوان، أكدت أن المعني بالأمر أكاديمي استفاد من انتمائه لحزب زعما وطني، وخْدم فالرباط ومن بعد خْدم فالوظيفة العمومية، وفْشل فتسيير القطاع الذي يشرف عليه، بتفويض من رئيس المجلس الجماعي.
صاحبنا كان ارتكب فضيحة أخرى، حين بغا ينظم شي ندوة بإسم شي جمعية وبتنسيق مع الجماعة، وكان غادي يحضر فيها المستشار “أندري أزولاي ” لولا الألطاف الإلهية وأيضا لولا تدخل الحكماء، باش رجعت الأمور للنصاب ديالها.
صاحبنا وخا عندو مكانة اجتماعية مرموقة إلا أنه غارق فالديون، وصحابو كاملين كِسالوه، وهذا الأمر لي بدا كِتْسبب في فقدان الثقة مع الزملاء والأصدقاء ديالو.
